விக்ரம் படத்தை பாராட்டித் தள்ளிய மகேஷ் பாபு!

விக்ரம் படத்தை பார்த்து, தெலுங்கு முன்னணி நட்சத்திரம் மகேஷ் பாபு பாராட்டு மழை பொழிந்துள்ளார். அதுமட்டுமின்றி இயக்குனர் லோகேஷ் கனகராஜை பார்க்க வேண்டும் என்றும் தெரிவித்துள்ளார்.

லோகேஷ் கனகராஜ் இயக்கத்தில் கமல் ஹாசன், விஜய் சேதுபதி, பகத் பாசில் உள்ளிட்டோர் நடித்து வெளியான தமிழ்த் திரைப்படம் விக்ரம். இப்படம் உலக அளவில் ரூ.500கோடி வசூலை நோக்கி சென்றுகொண்டு இருக்கிறது. கமல் சினிமா வாழ்க்கையிலேயே அதிக வசூல் செய்த படமாகவும் இது உள்ளது. இந்நிலையில் இப்படத்தை பார்த்த தெலுங்கு சூப்பர் ஸ்டார் மகேஷ் பாபு புகழ்ந்து தள்ளியுள்ளார். இதுதொடர்பாக அவர் தனது ட்விட்டர் பக்கத்தில் கூறியிருப்பதாது-

விக்ரம் ஒரு ப்ளாக் பஸ்டர் சினிமா. நவீன காலத்தின் மிகச் சிறந்த படைப்பு. இந்தப் படம் எப்படி உருவாக்கப்பட்டது என்பதை இயக்குனர் லோகேஷ் கனகராஜிடம் கேட்டு அறிந்து கொள்ள விருப்பமாக உள்ளேன். விக்ரம் மெய் மறக்கச் செய்யும், உணர்ச்சிப்பூர்வமான படம். சகோதரர் லோகேஷ் கனகராஜுக்கு பாராட்டுக்கள்.

விக்ரம் படத்தில் விஜய் சேதுபதியும், பகத் பாசிலும் அற்புதமாக நடித்திருந்தார்கள். இதற்கு மேல் சிறப்பாக நடிக்கவே முடியாது என்ற அளவுக்கு அவர்களது உழைப்பு இருந்தது. சிறந்தவொரு பின்னணி இசையை அனிருத் கொடுத்துள்ளார். விக்ரம் பட பாடல்கள் என்னுடைய ப்ளே லிஸ்ட்டில் நீண்ட காலம் இருக்கும்.

கடைசியாக லெஜெண்ட் கமல்சாரைப் பற்றி. அவரைப் பற்றி விமர்சனம் எழுத எனக்கு தகுதி கிடையாது. அவரின் மிகப்பெரிய ரசிகன் என்ற அடிப்படையில் இது எனக்கு பெருமை மிகுந்த தருணம். கமல்சார் உங்ளுக்கும், உங்களது டீமுக்கும் வாழ்த்துக்கள் சார் என்று பதிவிட்டுள்ளார்.